И.МӨНХСАРУУЛ: НАРЫГ ХААНААС Ч ХАРАХ АДИЛ, ХАРИН УУЛ УСАНД БОЛ НАР ХӨӨРСӨН ХОЙНО ОЧДОГ

Өглөөний нарыг харах гэж

Өндөр ууланд гарах хэрэггүй

Уул усанд гарна гэдэг

Учир ерөөлтэй байдаг юм

Үдшийн бүрий
Үүрийн гялаантай 
Хавсарга цохин байж
Хаан биеэ сэвтээгээд яахав
Хатан сэтгэлээ гундаагаад яахав

Дэлгэр сайхан уулын оройд
Тогтож нэгэнтээ нар мандаж
Дэндүү дээр хөөрсөн цагт нь
Тогтож нэгэнтээ очдог гэдгийг
Даамай өвгөд чинь 
Дахин дахин дуулгаж байна

Буурал сайхан нарандаа
Байгаа газраасаа сүүгээ дээдлэн
Буурал тэнгэрийн нарандаа 
Булбарай гараа тэнийлгээд
Бурхан сайхан аав ээжийнхээ нэрийг
Буулгаж өгсөн өөрийнхөө нэрийг хэлээд
Буянаа үрс минь аваарай...

Нарыг хаанаас ч тоссон адил, алтан нар хаа ч алагчлалгүй мандаж, ачлал буянаа хайрладаг. Харин уул, усандаа очъё гэвэл үүр, шөнийн зааг, үдшийн бүрийгээр биш нар өндөрт хөөрсөн цагаар очих нь зөв ажээ. 
Хайрхан уулын оройд гарч биш хормой бэлээс нь хүндэтгэн тосож ивээлийг нь хүртдэг юм шүү.
Сааль сүү, цайныхаа дээжтэй, арвай будаагаа өргөж, хамгийн гол нь өгөөмөр хайр, өргөх ерөөлөө дэвсэн золгодог.

Уулын аура буюу нөлөөллийн тойрог таны бодсоноос ч өргөн хүрээтэй шүү. Уулын эзэн тэнгэртэй шууд холбоотой оршино. Түүний дор шадар туслахууд болох савдаг, навдаг, шавдаг гээд олон шаталсан далд оршихуй бий. Хайрхадын эзэн хаанаас ч таньтай харьцах боломжтой.

Тэд таны овог нэрээр оньслогдсон мэдээлэл буюу ивээгч тэнгэр, өвгөд дээдэс, сүнсний чинь өмнөх төрлийн мэдээлэл гэхчилэнгээр таньж чадна. Иймд овог, нэрээ хэлдэг. Аав нь баруун чихэнд нь нэрийг шивнэж өгдөг нь энэ хорвоо ертөнц, орчлонд таниулж буй хэрэг юм. Эхэс, хүйг төрсөн буюу эцэг өвгөдийн нутагт оршоодог нь мөн л ийм учиртай. Хүн идэх хоол унднаас дутуугүй их эрчмийг газар дэлхий, нар, сар, од гарагсаас авдаг. Тэр бүхэн тэгш байж гэрлэн бие бүтэн байна.

Жишээлбэл, Долоон Бурхан одондоо хандаад долоон хүрдээ эрчлээд авчихдаг. Сарандаа өргөл өргөхөд сэв хир ариусч, сэтгэлийн гомдол гутрал арилна. Хоолойг чинь баглаж боогоод байдаг гуниг бухимдал сартай ярихад арилна. Учир нь сайхан үгийн чинь эрчим сартай холбоос үүсгэж таны биеийн усны мэдээллийг засаж буй юм. Сар энэ дэлхийн усыг хариуцдаг бол таны биеийн 70-аас дээш хувь ус шүү дээ. Нар бол галын буюу амин эрчмийг таньд хайрлагч.

Байгалиас хүчтэй нь үгүй. Ил оршигч бүхнийг далдаас ивээгч хүчин гэж бий. Тэр нь Мөнх тэнгэр, бүхий л тэнгэрүүд билээ.

Ийм л учраас Монгол хүн байгалиа шүтдэг. Шүтнэ гэдэг хайрлахыг хэлнэ. Таньж мэдэж, мэдэрснээр илүүтэй хайрлах нь зүй. Монгол хүн аливаад мухар сохроор ханддаггүй учир шашинд хэт туйлширдаггүй.  

Ухамсаргүйгээр үйлдсэн бүхэн мухар сүсэг, мунхаглал билээ. Тухайлбал ариун дагшин газрыг өргөл нэртэй "хог"-оор буртаглах, хадаг яндараар боож хүлэх, архи сархадаар бузарлах, чулуу хөдөлгөх, ухаж сэндийлж, элдэв зүйлээр эрээчиж сараачих энэ бүхэн хэрээс хэтэрч уул усны уур хилэнг өдөөсөөр буй нь харамсалтай.

Хүн дууриаж утга учиргүй үйлдэл хийхээ л больчихмоор. Үйлдлийнхээ утга учрыг мэдэж байж буян нь ирнэ.

: 2017-10-09 : 7899

Хамгийн их уншигдсан